Voeje, vuasta jïh gampa

Guhkebe enn 2 000 jaepieh leah båantah Orrestaaresne govsh, gaajhtsh jïh sïrvh åtneme. Lissine bearkoeh, dueljieh jïh ålloeh aaj juvri mielhkiem nuhtjieh.

 

Juvrh buhtjin dovne aereden jïh iehkeden. Mielhkie bæhtose gurkin. Gosse mielhkie boelhkem tjåådtjeme dellie buejtie, gïhpe, bæjjese gabpalostoe. Gïhpem gåajvoste jïh destie maahtah voejem darjodh. Maahtah jïjtje voejhkelidh dam darjodh jïh gïhpe sjåavodh goske voeje sjædta.

 

Gurkesth mielhkiem krovhtese jïh baahkenh dam (medtie 37 gradeerh). Vaeltieh krovhtem vuebneste, lissehte lööpem, sjåavohth jïh baajh mielhkiem tjåadtjodh. Gosse mielhkie leehpeme jïh ruarmam sjïdteme, dellie dam juakah jïh bïejh dam tjulhtese jïh baajh njåarodh. Dellie dov leah vuasta maam gaervies vöörhkedh.

 

Ruarmeste, gosse vuastam bæjjese vaalteme maehtieh ruarmadidh. Dïhte tjuara tjåadtjodh doeltelidh vuebnesne gellie tæjmoeh. Sjåavohth jïh vuejnieh guktie ij gåarodh.