Åesiestæjjah jïh vætnarassjh staaresne

Gaskoeh 1800-låhkoen raajan lij ajve åesiestæjjah jïh vætnarassjh gïeh åadtjoejin jielemedarjomh gïehtelidh staarine.

 

Åesiestæjja jïh vætnarassjh gie sijhti sïeltem tseegkedh staaresne tjoeri voestegh burskapem ohtsedidh. Vætnarassjh tjoerin jeenjemasth mïestereprieviem utnedh, vïhtesjimmie mij jeehti dah dej barkoem meehtin, dah lin professjonaale. Guktie orre köpingem Orrestaare viehkehti idtji dejnie pryjjh jïh baajin gaajhkh gïeh sïjhtin sïeltine aelkiestin. Destie sjïdti jïjnjh noerh böötin jïh sïjhtin læhkoem pryövedh, men lin dovres materijaalem åestedh jïh  gåetiem bigkedh, dah idtjin maehtieh maeksedh. Dellie jïjnjh konkursh sjïdtin dennie noere köpingisnie. Jeenjemes båantah jïh trïengkh dajvesne lin vaane skååffedh mah daarpesjin mubpede lehkeste.